حالة تخبط !

حاجات كتير جوا دماغى افكار واحاسيس وكلام
مشكلتى من زمان انى مبعرفش اتكلم مع اى حد وتقريبا كده على مايبدوا المشكلة اتطورت مع الزمن ومبقتش اعرف اتكلم اصلا !
لامع حد قريب ولا حد بعيد ! يعني على قد مبحس انى ف مشكلة الا انى مبعرفش اعبر عنها
كل اللى انا اعرفه عن نفسي انى قاعده اتخبط.
اتخبط بشكل كبير زى الطفل كده اللى لسه بيتعلم بيقف ويقع ويجرب .. انا لا انا عارفانى ولا عارفة انا عاوزه ايه !
ممم مش عاوزه اكون متشائمة اوى بس كل حاجه مش ماشية مظبوط مفيش نظام لأى حاجه
انا بقلق بسرعة بالذات من التغيير لكن اللى انا فيه دلوقت تخبط
مش عارفة التخبط والتقلب ده في صالحي ولا لا .. مش عارفة هيفيدنى ولا هيضرنى بس انا مضطرة اتعايش معاه بدون اى ضمانة لايه الصح وايه الغلط وايه المفروض يتعمل !
الايام بتبين كل حأجه وبتكشف حاجات كتير كنا قلقانين منها وعاملين حسابها !

مش مظبوطة

نحن لا نعالج المشاكل

الضعف البشري وكيفية التعامل معه.

للأسف في المجتمعات العربية يوجد الكثير من الجهل والقصور في التفكير
نحن لا نفكر في حل مشكلاتنا
أعترف أننى كنت أحد هؤلاء الذين يحتفظون بحلول معلبة جاهزة للمشكلات دون مراعاة توقيت المشكلة والزمن وتغيير الأوضاع ومراعاة الشخص نفسه الذي يتعرض للمشكله
فشخصية كل منا تختلف عن الآخر في تناوله للأحداث والتعامل معها
ومع هذا القصور في التعامل مع مشكلاتنا وأضف إلى ذلك الخجل من المجتمع وكذلك البعد عن الصراحة والإعتراف بالخطأ
تظل المشاكل تتفاقم بدون حلول .. فنحن نفضل أن نبقى في مشاكل عن أن نعترف أننا في مشكلة !
نخاف أن نواجه أنفسنا بكل صراحة أن بنا عوار بشري وأخطاء بشرية !
أحاول أن أخرج عن هذه الدائرة كلما سنحت لي الفرصة ، لكني أعود أدراجي إليها حيث أن الطبع يغلب التطبع .

كل واحد فى حالو ؟

زي ما خناقك مع الناس وضيقك منهم بيشيلك هم يخليك مضايق ومش مستريح او ع الاقل يعكنن عليك هدوءك
كمان وجود محبة بينك وبين الغير وانك تتعامل مع الجميع بود ويبادلوك نفس الشعور شئ جميل وبيكسبك راحة نفسية .
بس مبقتش قادرة احب الناس قوى .. او اتعامل معاهم بود
يمكن حذر او خنقة نتيجة انى اتعاملت مع مجموعة من البشر ومطلعوش قد كده
او لان الانسان لما يبقى عندو مشاكل تشغل بالو مابيبقاش عنده تقبل انه يفتح علاقاته الاجتماعية

على كل حال .. المحاولة تانى مش هتخسرنا
والتعامل الكويس وتقديم المحبة هو الصح دينا وخلقا
بغض النظر عن بعض الغرباء اللى بنقابلهم فى حياتنا
مش هبني تصرفاتى على اساسهم

وبينا نبقى ودودين مع البشر <3

مش هسمعك

كلنا بنحتاج ونبفرح لما نلاقى حد يهتم بينا بالذات لو فهم مشكلتنا وحاول يعرف عنها اكتر وبنقعد نرغى بقى ونحكى وهكذا
ده غير اننا كمان مبننساش الشخص اللى دايما يسألنا عملتو ايه فى مشكلة ما
زمان يعنى مو كام سنة كنت بحب ابقى الشخص ده اسمع مشاكل المقربين منى واحاول اساعدهم..
 مش عارفة ليه دلوقت مبقتش قادرة اسمع حد .. ببقى عارفة انه مش هيتطلب منى مجهود كبير عشان احسس حد قريب منى انه مش لوحده
اختى او امى او صديقتي
 لكن احساس شبه الامتلاء ! 

اللى فينا مكفينا
وده احساس سئ جدا الصراحة

الحب غاية !

رغم أنه وجد ليعينك على الحياة ، ستفقده وتبحث عنه وتستعين بكل الحياة ليكون غايتك الأولى ! #عبث





كانت status كتبتها ع الفيس بوك , وطبعا محدش فهم انا بتكلم عن ايه :D (عندهم حق )
السؤال هنا بقى ليه بقى الحب غاية ؟!


لكن فى الحقيقة المجتمع بتاعنا قرر يخلي الحب والزواج شئ بعيد المنال لحاد منفضل كلنا ندور عليه!

لا ونحلم بيه ونألف افلام واغانى ونعيش فى اوهام !!


وفي فريق بعد ما ادرك اهمية الحب قرر انه يعيشه بطرق ملتوية واللى غالبا بتنتهي بقصة مؤلمة ونالف اغانى عن الفراق والخدااع والخ بزيادة يعنى

وفى فريق قرر انه يلتزم بدينه باخلاقه او حتى مش عاوز يعيش جو( اليع) بتاع صاحبي وصاحبتي ويدخلو يتكلمو فى الحمام D: 


الفريق ده  بقى بيتبهدل
 ( اه والله ياجماعه :D )

ساعات يحاول يخش فى جو اليع ويقوم يرجع تانى وساعات بيندمج فى حاجات بتشغله وده بيبقى شئ رائع لانه بينشغل بحاجات صحية ويفضل بقى يحلم باليوم اللى هيتجوز فيه او تحلم باليوم اللى هتبقى فيه عروسة او حتى معاها شخص شريك حياة بما تحمله الكلمة من معنى !

نظرية القوالب ومفاجاة الصدمة!

كالعادة فى مصر
احنا بنتحط فى قوالب زى التعليم وطريقته ، طريقة حياتك وتسلسلها حتى يومك في شكل نموذجى كده او قالب مفروض تعيش بيه
لما اى حد فينا بيفكر يطلع بره القالب ده بيبدا يتصدم !
حاجات مختلفة ودنيا جديدة
الفلاسفة والعلماء وربما العظماء تقريبا كلهم فى فترة من حياتهم طلعو بره القالب ده
وده بصراحة شئ يطمن (( هنبقى عظماء :-D))

ع العموم مش هي دى النقطة بالظبط اللى عاوزه اتكلم فيها بس قريبة منها
انا كمان اتربيت فى قالب
بالنسبالي مقياس النجاح والفشل .. الانجاز والبلادة مرتبط ارتباط وثيق بالدراسة .. الدراسة وفقط
وعلى قد ماده سببلي مشاكل نفسية وكمان تحجيم لقدرات عندى لكن كمان صدمنى حاليا !
من شوية اتعرفت على ناس بيفكروا
اه والله :-D
يعنى شباب وبنات في سني
اجتماعات وندوات .. افكار وكتب !
تضاءلت جمبهم
كان بيتهيألى انى متفوقة على كل دول طالما بطلع الاولى (الشئ ده حتى مبقتش بحققه نتيجة لتغير الحال وكده )
المهم على قد ماكنت فرحانة بالشئ الجديد اللى دخلت فيه ده .. على قد ماكنت مصدومة كده انى مش احسن حد ولا حاجه !
لا ده كمان انا لسه فى الاول اوى
كنت خايفه ده يكون احساس بالحسد .. بس انا عارفة نفسي فى حاجه مش مظبوطة حاسة بيها
صراحة
مش عارفة انا مضايقة ليه ؟!